મારું દ્વિતિય બાળ પુસ્તક "પારેવાં રે પારેવાં" આપના કર કમળમાં મૂકતાં નવપલ્લવિત થાઉં છું. બાળ કલાપ્રેમીઓ તેમજ બાળકો વાંચશે, ગમાડશે અને એમાંથી પ્રેરણા લેશે, એવી આશા રાખું છું. આમ તો નાનપણથી જ ઘરના વાતાવરણે મને ઘડ્યો છે. મારાં બા ટુચકા, જોડકણાં, બાળકોને ગમતી વાર્તા, ગીતો, શિવાજીનું હાલરડું વિગેરે સંભળાવતાં. એ મને ખૂબ ગમતું. એમાંથી પોષણ મળ્યું. મારા પિતાજી રાજારાણીની વાર્તાઓ, શૂરવીરોનાં પરાક્રમો સંભળાવી મારામાં જોશ ભરતા. મારા ઘરનું વાતાવરણ આનંદદાયી અને ધાર્મિક સંસ્કારોથી પરિપૂર્ણ હતું. મને ધીમે ધીમે રમતાં, ખીલતાં, વાંચન પ્રત્યે જિજ્ઞાસા વધી અને મારામાં બા-બાપુજીએ જે સિંચન કરીને મારો ઉછેર કર્યો હતો, એમાંથી સહજ પ્રેરણા લઈને મારામાં પડેલો બાળ સહજ ભાવ તેમજ કલા પ્રત્યેની લાલસા સમય જતાં ઉભરી આવી. વર્ષોની કમાણી કરીને કલમ કસીને આપની સમક્ષ પ્રગટ થયો છું. બા-બાપુજી તેમજ અન્ય પ્રેરક માધ્યમોનો હું જેટલો ગુણ માનું એટલો ઓછો છે. મને ભણાવ્યો, પોષ્યો અને મારામાં ખરાબ દુષણો ન ઘૂસે એનું સતત ઘ્યાન રાખ્યું. મળેલો સંસ્કાર વારસો સાચવ્યો, એનું ગહન ચિંતન કર્યું અને સુપેરે એને પાર પાડ્યો. બા-બાપુજીનો હું અત્યંત ઋણી છું. આશા છે કે મને મારી આ અવિરત, અનંત, અણથક યાત્રામાં સૌ કોઈ સંમતિ અને સાથ આપી જોડાશે અને મારો વેગ પૂરો પાડશે. અસ્તુ!
