Jalsa

Hitesh Patadiya 03 May 2022 6.5

બોલીવૂડમાં વાર્તાને ઈમાનદાર રહીને બિનજરૂરી મસાલા વિનાની ફિલ્મો ઓછી જોવા મળે છે. હવે અપવાદો ચોક્કસથી વધવા લાગ્યા છે. આ ફિલ્મ એવો જ એક અપવાદ છે. પ્રતિષ્ઠિત જર્નાલિસ્ટ દ્વારા હિટ એન્ડ રનની ઘટના બાદ લેવાતા નિર્ણયો, ઘટનાનો ભોગ બનેલ પરિવારની મજબૂરી અને દુઃખ, રહસ્ય, તપાસ, પોલીસની ભૂમિકા, રહસ્યના પૂંછડે વળગેલું વધુ એક રહસ્ય, રહસ્ય ઉજાગર કરતી કુલ ત્રણ અલગ ઘટનાઓ, એકના બદલે ત્રણ રહસ્યો, "જલસા" શબ્દ સાથેની ખાસ સંયોગ ધરાવતી બાબત વગેરેથી રસપ્રદ બનતી સ્ક્રિપ્ટ પ્રેક્ષકને જકડી રાખે છે. વધુમાં જ્યારે એક પાત્ર તરફથી પોતાની રીતે ન્યાય તોળવાની દિશામાં બદલો લેવાનો જલદ નિર્ણય લેવાય છે, ત્યારબાદ દર્શાવાતો તણાવ વગેરે મજબૂત સ્ક્રિપ્ટની સાક્ષી પૂરે છે. બોનસમાં બંને મુખ્ય પાત્રો - વિદ્યા બાલન અને શેફાલી શાહનો સચોટ અભિનય આખી ફિલ્મનું સ્તર ઉચ્ચ કક્ષાએ લઈ જાય છે. બંને કલાકારોએ ભૂતકાળમાં પોતપોતાની ક્ષમતા સાબિત કરેલ જ છે. આથી જ એવો વિચાર પણ આવશે કે બંનેના પાત્રો એક્સચેન્જ કર્યાં હોત તો પણ પરિણામ સમાન જ મળત. શેફાલી શાહના પાત્રમાં ક્યાંક જરાક વધુ પડતો આત્મવિશ્વાસ કે સશક્ત બોડી લેન્ગવેજ પાત્રની સામાજિક અને આર્થિક સ્થિતિ સાથે બંધબેસતી નથી જણાતી. જોકે તે બાબત અભિનયની ગુણવત્તાને ઝાઝી અસર નથી કરતી. એકને બદલે બે સ્ત્રી પાત્રો મુખ્ય ભૂમિકામાં હોય તેવી ફિલ્મ બનાવવાનું જોખમ કદાચ બંને કલાકારોની અભિનય ક્ષમતાના કારણે સરળતાથી લેવાયું હશે તેમ અંદાજવું સરળ છે. બંને પાત્રોના મનમાં મચેલ ઘમાસાણ, અંગત માન્યતા કે ઈમાનદારીમાં રહેલ ઊણપ, માનસિક નબળાઈ, પરિસ્થિતિ સામે મોરલને કોરાણે મૂકવું, વ્યવહારું છટકવૃત્તિ, પસ્તાવો વગેરે વિવિધ શેડ માનવસહજ મર્યાદા અને મજબૂતી - બંને દૃષ્ટિકોણથી રજૂ થયેલ છે. વિદ્યા બાલને અગાઉ ઘણી વખત તેની અદ્ભુત અભિનય ક્ષમતા સાબિત કરેલી જ છે. આ ફિલ્મમાં તેની પસંદગીને ઉચિત સાબિત કરેલ છે, છતાં અમુક સીન ખેંચાયા હોવાના કારણે રિપીટ થતાં જણાય છે. જેથી વિદ્યાની પ્રતિભા ઓછી નથી થતી પરંતુ ડિરેક્ટરની અણઆવડત છતી થાય છે. પોલિસ પાત્રોના ભાગમાં આવેલ મજબૂરી કે સંયોગ તો ગળે ઊતરે તેમ છે, પણ પોલિસ પાત્રોની પસંદગી, અભિનય, ડાયલોગ અને ઉભડક આવતી ઉષસ્થિતિ મજા બગાડે છે. પાત્રો સચોટ અને રિયલ નથી જણાતા. વધુ સારા કલાકારો અને કડક સ્ટોરીલાઇન સાથે પોલિસની ભુમિકા ઘણી વધુ અસરકારક દર્શાવી શકાઈ હોત. ફિલ્મમાં કુલ ત્રણ શાબ્દિક અને ચાર ઇન્સ્ટ્રુમેન્ટલ ટ્રેક છે. જે ઘટના કે મનોસ્થિતિ મુજબના એટલે કે યોગ્ય જણાય છે. ફિલ્મનું એડિટીંગ અને બે કલાકની લંબાઈ ઉચિત જણાય છે. લોકેશન, ડિરેક્શન, પરિવેશ વગેરે વાર્તાને અનુરૂપ સાબિત થયેલ છે. ફિલ્મમાં છેલ્લે દરિયાકિનારે દર્શાવેલાં બે જરૂરી મહત્ત્વના દૃશ્યોનું ડિરેક્શન ખૂબ સરસ છે. બંને પાત્રોના મનમાં ચાલતી બહુરંગી મનોમંથન બાદ છેલ્લા સીન વખતે દર્શાવાતું મૌન ઘણું જ કહી જશે. એક આર્ટિસ્ટિક ટચ સાથે ફિલ્મ પૂર્ણ થાય છે. બિનજરૂરી સીન તથા સિનસપાટા વિનાની, વાર્તાને ઈમાનદાર અને સરસ અભિનય ધરાવતી વિમેન સેન્ટ્રીક (સ્ત્રી પ્રધાન) થ્રિલર ફિલ્મ એક વખત ચોક્કસથી જોવા જેવી છે.

બોલીવૂડમાં વાર્તાને ઈમાનદાર રહીને બિનજરૂરી મસાલા વિનાની ફિલ્મો ઓછી જોવા મળે છે. હવે અપવાદો ચોક્કસથી વધવા લાગ્યા છે. આ ફિલ્મ એવો જ એક અપવાદ છે. પ્રતિષ્ઠિત જર્નાલિસ્ટ દ્વારા હિટ એન્ડ રનની ઘટના બાદ લેવાતા નિર્ણયો, ઘટનાનો ભોગ...Read more