Prawaas

Jyotindra Mehta 30 April 2023 7.5

  જે જન્મે છે તેનું મૃત્યુ નિશ્ચિત છે પણ જન્મ લેનાર દરેક વ્યક્તિ જીવન જીવે છે એવું નથી હોતું અને હું જીવવા માગું છું. આ ડાયલોગ છે ફિલ્મના ૬૭ વર્ષીય હીરોનો. આ વાર્તા છે વૃદ્ધાવસ્થામાં પહોચેલા અને સીકેડી (ક્રોનિકલ કીડની ડીસીઝ)થી પીડાતા હીરોની જે પોતાના જીવનને નવી દિશા આપે છે.             શરૂઆતમાં જ બતાવી દીધું કે એક યુવાન અભિજાત(અશોક સરાફ)  ગામડામાંથી શહેરમાં હીરો બનવાના સ્વપ્નો લઈને આવે છે અને સંસારની ઘટમાળમાં એવો રમી જાય છે કે તે પોતાના સ્વપ્નને ભૂલી જાય છે અને જ્યારે તે જાગે છે ત્યારે તે ભયંકર બીમારી સામે લડી રહ્યો હોય છે. તે પોતાની બીમારીને લઈને બહુ સેન્સેટીવ હોય છે અને ડોક્ટરને પ્રશ્નો પૂછીને પોતે હેરાન થયા કરે છે.             તેની અર્ધાગીની લતા (પદ્મિની કોલ્હાપુરે) તેને પોતાના જીવની જેમ સાચવે છે. હંમેશા ચિંતાગ્રસ્ત રહેતા અભિજાતને ખબર નથી હોતી કે શું કરવું જોઈએ. અમેરિકામાં રહેતો તેનો પુત્ર દિલીપ(શશાંક ઉદપુરકર) તેને સલાહ આપે છે કે પોતાનો ફોકસ શિફ્ટ કરો.            એવા કપરા સમયમાં તે પંડિત રમાકાંત જોશીના  (રજીત કપૂર) શાસ્ત્રીય સંગીતના કાર્યક્રમમાં હાજરી આપે છે અને શાસ્ત્રીય સંગીતમાં સમજ ન પડતી હોવા છતાં તેને તે ગીત બહુ ગમે છે અને તે પંડિતજીને મળે છે અને તેમને પૂછે છે,”તમને આ ગીતો ગાવા ઉર્જા અને ડેડીકેશન ક્યાંથી મળે છે?” ત્યારે તે જવાબ આપે છે કે તમારા જીવનમાં બે દિવસ મહત્વના છે એક જે દિવસે તમે જન્મ્યા છો અને બીજો દિવસ તે જ્યારે તમે જાણી લો કે શા માટે? એક વાર જીવનનું ધ્યેય નક્કી થઇ જાય ત્યારે તમને તે કામ કરવા માટે ઉર્જા મળી રહે છે.             અભિજાતની આંખો ખુલી જાય છે અને તે પોતાની કારને એમ્બ્યુલન્સમાં ફેરવી નાખે છે જેનાથી લોકોની મદદ થઇ શકે. પોતે સીકેડીથી પીડાતો હોવા છતાં તે આ મિશન પોતાના ખભે ઉપાડે છે અને લોકોને મદદ કરે છે.             વાર્તાનો એકધારો પ્રવાહ ફિલ્મમાં કંટાળો આવવા નથી દેતો. જીવનનો દરેક ઉપદેશ બહુ સહજ રીતે કોઈ મોટા તડાકાભડાકા કર્યા વગર આપી દીધો છે. શશાંક ઉદપુરકરનું ડિરેકશન ઉત્તમ કક્ષાનું છે આ પહેલાં તે અન્ના નામની ફિલ્મ આપી ચુક્યા છે. ફિલ્મની સ્ક્રીપ્ટ શશાંક ઉદપુરકરે જ લખી છે. સલીમ-સુલેમાનનું સંગીત કર્ણપ્રિય છે અને ફિલ્મના ગીતો વાર્તા અવરોધવાને બદલે વાર્તા આગળ વધારવામાં મદદ કરે છે.             એક્ટિંગના મામલે અશોક સરાફ માટે ફક્ત એક જ વાક્ય કહી શકાય ‘અસા અભિનેતા પુન્હા હોણે નાહી (આવો અભિનેતા પાછો ન થઇ શકે.)’ દરેક દ્રશ્યમાં ફક્ત એ જ દેખાય છે, તેનો ભાવવાહી અભિનય ફિલ્મને જીવંત રાખે છે. પદ્મિની કોલ્હાપુરેએ એક્ટિંગ સારી કરી છે પણ જ્યારે અશોક સરાફ સામે હોય ત્યારે તે થોડી ઝાંખી લાગે એ નિશ્ચિત છે. પોતાના ફાળે એક બે સીન હોય તો પણ બીજા બધાને ઝાંખા પાડી શકનાર વિક્રમ ગોખલેએ પોતાનો આ સિલસિલો ચાલુ રાખ્યો છે. ડોક્ટર તરીકે એક બે સીન કરનાર વિક્રમ ગોખલે તે સીનમાં પણ પ્રભાવ છોડી શક્યા છે. શ્રેયસ તલપડે પણ મહેમાન કલાકારના રોલમાં છે. શશાંક ઉદપુરકર ડાયરેકટર તરીકે ઉત્તમ છે પણ અશોક સરાફના પુત્રના રોલમાં બહિ ઝાઝો પ્રભાવ છોડી શક્યા નથી.             કોઈ જાતની મારધાડ વગરની એક ૬૭ વર્ષીય વૃદ્ધ હીરોની કથા કહેનાર અદ્ભુત ફિલ્મ.

  જે જન્મે છે તેનું મૃત્યુ નિશ્ચિત છે પણ જન્મ લેનાર દરેક વ્યક્તિ જીવન જીવે છે એવું નથી હોતું અને હું જીવવા માગું છું. આ ડાયલોગ છે ફિલ્મના ૬૭ વર્ષીય હીરોનો. આ વાર્તા છે વૃદ્ધાવસ્થામાં પહોચેલા અને સીકેડી (ક્રોનિકલ કીડની ડીસીઝ)થી...Read more