દર્દીઓની ફરિયાદ સાંભળવી, તેનું નિદાન કરવું અને સારવાર આપવી આ દરેક તબીબના જીવનનો ભાગ છે પરંતુ, તેનાથી પણ વિશેષ દર્દી અને તબીબ વચ્ચે એક શ્રદ્ધા અને લાગણીનો સેતુ હોય છે. મારી દ્રષ્ટિએ જો એ સેતુ મજબૂત હોય તો સારવાર ખુબ સરળ અને ખુબ જ અસરકારક નીવડે છે. છેલ્લા ૪૬ વર્ષથી વધુ સમયના મારા તબીબી વ્યવસાયમાં મારા દર્દીઓ અને મારા વચ્ચે આ સંવેદનાઓને શ્રદ્ધાનો મજબૂત સેતુ બંધાઇ ગયો છે. તેઓ મને તબીબથી વિશેષ એક કુટુંબીજન માને છે અને હું પણ તેમને મારા કુટુંબી ગણું છું. આટલા વર્ષોમાં લાગણી સભર, દુઃખદાયક અને હસવું આવે એવા કેટલાય પ્રસંગો બન્યા છે, જેમણે મારી જિંદગીને સમૃદ્ધ કરી છે. આવા થોડા પ્રસંગો અહીં રજુ કર્યા છે. આ દરેક વાર્તા, પ્રસંગનું શબ્દસહઃ વર્ણન છે, તેમાં કોઈ સાહિત્યિક ઉમેરો નથી, કોઈ કલ્પના નથી, કશું ઉમેરવામાં કે બાદ કરવામાં નથી આવ્યું. મને આશા છે વાચકોને આ ગમશે!
