મધ્યકાલીન ગુજરાતી સાહિત્યની ઉત્તમ રચના, 'વસંતવિલાસ' ફાગુ કાવ્ય આપણા કાવ્ય સાહિત્યમાં એક નોંધપાત્ર પડાવ છે. એના સર્જકની જાણકારી પ્રાપ્ત થતી નથી, પરંતુ એનું સર્જન ૧૪૫૨ આસપાસ થયું હોવાનું મનાય છે. શૃંગારમાં તરબોળ સમગ્ર કાવ્યમાં ક્યાંક પ્રતીકાત્મક રીતે ભક્તિભાવ પણ પ્રગટે છે. આટલાં વર્ષો પછી પણ એની પંક્તિઓમાંથી વસંતમાં તાજા જ ખીલેલા ફૂલો જેવી સુવાસ પ્રસરે છે. મેં પ્રથમવાર જ્યારે 'વસંત વિલાસ' કાવ્ય વાંચ્યું ત્યારે આહ અને વાહ બંને એક સાથે સરી પડ્યા. ભાષાની વિવિધતા, રચના શક્તિ, વિષય અભિવ્યક્તિની વિશિષ્ટતા હૃદયને સ્પર્શી ગઈ. શબ્દો એટલા અઘરા હતા કે શબ્દકોશ લઈને વાંચવા બેસવું પડતું. ત્યારે જ સરળ ગુજરાતી ભાષામાં 'વસંતવિલાસ'ને બાંધવાનો વિચાર થઈ આવેલો. એનું પરિણામ એટલે આ પુસ્તક. સામાન્ય વાચક પણ સમજી શકે એવા શબ્દોમાં અને શૈલીમાં પ્રણયરસ પીરસવાનો વિનમ્ર પ્રયાસ કર્યો છે. આશા છે આ પંક્તિઓની સુવાસ આપના મનને પ્રફુલ્લિત કરશે.
