સ્વ. શ્રી વિજયભાઈ ‘મોડર્ન’ ભટ્ટ સાહેબની યાદગીરીમાં શોપિઝને ટૂંકી વાર્તાઓની એક સ્પર્ધા યોજેલી હતી, જેને ખૂબ પ્રેમાળ પ્રતિસાદ મળ્યો અને ભાગ લેનાર પ્રતિભાવાન શોપિ-સર્જકોએ સ્પર્ધાના બાગને પોતાની સુંદર કલાકૃતિઓ જેવી વાર્તાઓથી મહેકાવી દીધો. આજે એ જ વાર્તાઓનું પુસ્તક “દિવ્યજ્યોત” પ્રગટ થઈ રહ્યું છે ત્યારે અંત્યત આનંદની લાગણી અનુભવી રહ્યો છું. આ પુસ્તક અનોખું એટલા માટે છે કે એની બ્રેઇલલિપી આવૃત્તિ પણ શોપિઝન તરફથી પ્રકાશિત થવા જઈ રહી છે. સ્વ. શ્રી વિજયભાઈએ પ્રજ્ઞાચક્ષુ વાચકોના જીવનમાં શબ્દ સ્વરૂપે એક દિવ્ય જ્યોત પ્રગટાવી હતી અને એમના એ જ કાર્યને અંજલિ તરીકે આકાર લઈ રહેલું આ “દિવ્યજ્યોત” પુસ્તક પ્રજ્ઞાચક્ષુ વાચકમિત્રોને એમની સ્નેહાળ હાજરીની સતત અનુભૂતિ કરાવતું રહેશે એવી આશા છે. આમાં સામેલ સુંદર વાર્તાઓ સહુ પ્રજ્ઞાચક્ષુ મિત્રો અને અને સાહિત્ય રસિકોને પણ જરૂર ગમશે. સ્વ. શ્રી વિજયભાઈની પ્રવૃતિઓ અને કાર્યોની સુવાસ કાયમ મહેકતી જ રહેશે અને એમની અમી દૃષ્ટિ એ જ્યાં પણ હોય ત્યાંથી આપણા પર સદા વરસાવતા જ રહેશે. આજે એમની સ્મૃતિ સાથે આ પુસ્તકનો શુભારંભ કરીએ, એક એવી શબ્દરૂપી દિવ્ય જ્યોત પ્રગટાવીએ જે સૌનાં અંતરમાં અજવાળું પાથરે. આ પુસ્તક સાથે સંકળાયેલા સહુ લેખકમિત્રો અને અન્ય સહાયકોનો પણ ખૂબ ખૂબ આભાર. આ પુસ્તક સ્વ. શ્રી વિજયભાઈ ‘મોડર્ન’ ભટ્ટ તરફથી સહુ મિત્રોને સાદર અર્પણ છે.
