વ્હાલનો મીઠો દરિયો (આ લાઇન સેન્ટર મારા પિતાશ્રીનો પરિચય મારી કલમે આપતાં હું હર્ષની લાગણી અનુભવું છું. મારા પિતા “મંગલ કાથડ" ઉપનામથી ગઝલો લખે છે. એમનું વ્યક્તિત્વ સાવ સીધું અને સરળ છે. તેમને શબ્દ સાથે અતિશય પ્રેમ છે. શબ્દને તેઓ ઘોળીને પી જાય છે કે શબ્દ તેમને ઘોળીને પી જાય છે, તે કહેવું અતિ મુશ્કેલ લાગે છે. શબ્દ પ્રત્યેનો લગાવ એ જ તેમનું વ્યસન છે. તેઓ જ્યારે લેખન કાર્ય કરતાં હોય, ત્યારે શબ્દ સાથે એટલાં બધાં ઓતપ્રોત થઈ જાય છે કે, તેઓ ક્યાં ક્યાં પહોંચી જાય છે અને ખોવાઈ જાય છે, તેની તેમને ખબર હોતી નથી. અમે બોલાવતાં હોય તો તેની પણ ક્યારેક તેમને ખબર હોતી નથી. તેમના માટે કલમ એટલી વંદનીય છે. તેમની ગઝલોમાં મોટે ભાગે ઈશ્કે હકીકી મિજાજનો લહાવો મળે છે. તેમજ સાંપ્રત પ્રવાહની અનુભૂતિ જોવા મળે છે. તેઓ પદ્યમાં ગઝલ, ઊર્મિ ગીતો, બાળકાવ્યો અને અછાંદસ રચનાઓ લખે છે, જ્યારે ગદ્યમાં લઘુકથા અને બાળવાર્તા લખે છે. તેઓ બાળ કાવ્ય લખીને પોતે જ સ્વરબદ્ધ કરી ગાય છે તેનો મને અનુભવ છે. હું પણ મારા પિતા જેમ પ્રાથમિક શિક્ષક છું. અમે શિક્ષણને લગતી તાલીમમાં સાથે હોઈએ છે. પ્રાર્થનામાં તેઓ પોતાનું લખેલું બાળ કાવ્ય બોલી બધાને ભાવ-વિભોર કરી દે છે, તે મારો પ્રત્યક્ષ અનુભવ છે. તેઓ પોરબંદરની કલરવ સાહિત્ય સંસ્થાના સભ્ય છે. એ સંસ્થા દ્વારા "કલરવ" નામનું પુસ્તક પ્રકાશિત કરવામાં આવેલું. જેમાં તેમની રચનાઓનો પણ સમાવેશ કરવામાં આવેલો. તેમની રચના વાચકગણને ખૂબ જ ગમે છે. તેમની પ્રત્યેક ગઝલમાં માનવ જીવનની વાસ્તવિકતાનું નિરુપણ સરસ અને સહજ રીતે ઊપસી આવે છે, જે સાહિત્ય રસિકોનાં મન ઉપર અનેરી છાપ છોડી જાય છે. તેમનો "ટશર ફૂટી પાંદડે" ગઝલ સંગ્રહ સાહિત્ય જગતમાં એક મોરપીંછ સમાન સાબિત થશે અને વાચકગણની પિપાસા અવશ્ય સંતૃપ્ત કરશે એવો મને આત્મવિશ્વાસ છે. એટલું કહી હું મારી કલમને વિરામ આપું છું. જય ભારત. જય જય ગરવી ગુજરાત. - હિતેશભાઈ મંગાભાઈ કાથડ