ગઝલનો પ્રકાર મને બહુ ગમે છે. હું મૂળ વાર્તાકાર પરંતુ ગઝલો વાંચવી, ગાવી લગભગ ચાળીસેક વરસથી ગમે છે. ગઝલનું સ્વરૂપ એટલે રદીફ, કાફિયા, ઉલા, સાની, મિસરાની વાબસ્તગી સાથે બહર અને દાવા-દલીલમાંથી સધાતો કાવ્યરસ… આ બધું ગઝલ તેમજ તેનાં છંદશાસ્ત્રોના અભ્યાસથી પરિપક્વ થયું. આકાશવાણી ભુજ તેમજ સાહિત્યિક સંસ્થાઓ દ્વારા યોજાતા મુશાયરાઓમાં ભાગ લઈને ગઝલ રજૂ કરવાની કળા પ્રત્યેનાં ખેંચાણ બાદ માંડવી-કચ્છનાં 'વિવેકગ્રામ પ્રકાશન'ના પુસ્તક પ્રકલ્પ અધિકારી, ગોરધનભાઈ પટેલ 'કવિ'ના સહયોગથી પ્રથમ ગુજરાતી ગઝલ સંગ્રહ 'મનતરંગ' અને ત્યાર પછી બીજો ગઝલ સંગ્રહ 'તે શક્ય છે' પણ પ્રગટ થયો. તે દરમિયાન ગઝલકાર મિત્ર મંગલ હમીર કાથડ 'મંગલ' મારફતે શોપિઝન પ્રકાશનનો પરિચય થતાં થોડા જ સમયગાળામાં આ ત્રીજો ગઝલ સંગ્રહ 'મૌનનું પગેરું' પ્રગટ થઈ રહ્યો છે. આ ક્ષણે શોપિઝન પ્રકાશનનો આભારી છું. રસપ્રદ પ્રસ્તાવનાકાર, ગઝલકાર પૂર્ણિમાબેન ભટ્ટ 'શબરી' અને મારો પરિચય લખી આપનારાં ગઝલકાર દિવ્યા દેઢિયા 'દિવ્ય'નો આભારી છું.
