જીવનને સમજવામાં મદદરૂપ બને તેવા મારા આ લેખનો સંપુટ આપના હાથમાં મૂકતા આનંદ થાય છે. જીવનમાં આવતી મુશ્કેલીઓ, વિપરીત સંજોગો અને ના ગમતી કોઈ વ્યક્તિઓને કઈ રીતે સમજવી તે મારી આદત રહી છે. દરેક વાતને ભાવનાત્મક રીતે મૂલવવાની મારી ટેવ છે. મારી તે ટેવને વિકસાવવામાં ફાળો આપનાર મારા માતા-પિતાનો આભાર. જેમણે દરેક સંજોગ અને વ્યક્તિનો સ્વીકાર કરતા શીખવ્યું. શાળા જીવનના મારા એક ગુરુ નાગરસરે પણ મારી આ દૃષ્ટિને વિકસાવવામાં ફાળો આપ્યો. તો મારા પતિએ કોઈ બળાપા વગર જીવનમાં આવેલ આંધીઓનો સામનો કરવાની હિંમત આપી. જીવનમાં બનતી ઘટનાઓને હરેક જણ પોતાની રીતે મૂલવે જ છે. પણ તેમાં હકારાત્મક સમજનું પાસુ આવી જાય તો તેનું અર્થઘટન જ બદલાઈ જાય. આસપાસની વ્યક્તિઓને અને તેમના વર્તન-વલણને સારી રીતે સમજી શકાય. જીવનમાં શાતા મેળવવામાં મારું આ પુસ્તક તમને ઉપયોગી બની રહે તે જ અભ્યર્થના. અગાઉ પ્રકાશિત મારી રચનાઓના બંને પુસ્તક 'નાનકડી વાતો જીવનની' તથા 'અગોચર વાતો મનની'ને સારો પ્રતિસાદ મળ્યો હતો. આશા રાખું છું આપ સર્વે વાચકોનો વર્ગ આ પુસ્તકને પણ આવકારશો.
